引言
相信玩開隨身音響嘅朋友，對Eletech不再陌生。只係成立了短短五年，創辦人Eric卻一次又一次推出令人眼前一亮的產品。由初階的「三德像」系列到旗艦級的「帕爾納斯山」系列，各條線材各有特色，為燒友深愛的耳機更上一層樓。值得提及嘅係，Eletech直到依家有兩條香港限定版耳機線：泰爾紫(Tyrian)同維多利亞(Victoria)。本人曾試過Victoria，溫柔細膩嘅聲線，讓聽者享受analog嘅質感，難怪咁受本地，甚至外國headfi嘅燒友稱讚。
廢話唔多講，咁作為第三條香港限定版耳機線，Enigma的表現又如何呢？係我分享之前，先俾我少少時間介紹依條線材：
Eletech香港限定Enigma with VERSA Technology 三重混編頂級銀鍍鈀屏蔽線
材料：單晶銅，銀鍍鈀，銀鍍金
技術：VersaTM可換式耳機插針模組，FlexiMax InsulationTM特製線皮，-196oC超低溫冷凍處理技術，9 Core Geometry幾和編織組合法
造工
攞起條線，第一個感覺：「哇，條線粗咗喔。」的確，相比Eletech大部分4絞線材，Enigma俾佢哋更粗。不過，咁樣並非壞事 - 對我嚟講，線材咁樣嘅粗度反而更好。適當的重量不但可以令條線固定係耳托，線身仲唔會浮嚟浮去，有助增強穩定性。佩戴感方面，線身一如Eletech線材，輕柔舒適0打撠，係我demo嘅40分鐘內我無一次需要調節佩戴。線材佩戴舒服，其實係一樣好重要嘅quality。的確，影音線材都係「音質行先」；不過，玩開線材嘅朋友都知道，舒適感絕不可忽略。話哂都叫「隨身音響」，條線幾好聽都好，仲硬過把間尺，郁少少條線又跌出嚟，邊嗰都燥啦。
不過，依條線最大嘅賣點，在於Eletech首次加入的新技術 - Versa模組。依嗰模組最大嘅功能，莫過於「一線走天涯」。無論你係用2-Pin頭嘅耳機（如Empire Ears，Dita Audio等)，MMCX頭嘅耳機（如Campfire Audio，Final Audio等)，甚至其他耳機頭嘅耳機，透過更換插針，耳機線可以同你嘅耳機好好適配。值得一提嘅係，Versa模組除咗插針，插座之外，仲有保護蓋。對如我嚟講，依嗰係一樣好重要嘅設計，因為佢能夠固定插針同插座，唔會因為輕微嘅郁動而鬆咗。我親身試過更換模組，成個過程都係大約1分鐘左右，十分方便。如此適配度高，快捷，可靠嘅技術，絕對係依條線其中一個大賣點。
聽感
係分享大家最有興趣嘅部分之前，請俾少少時間我形容自己嘅聽音觀，以及配搭。我自己比較喜歡偏暖嘅器材，因為嗰種analog味既舒服，又吊癮，令人沉浸係音樂嘅懷抱之中。我聽嘅歌十分雜食，以下係我部分嘅test track:
Tchaikovsky - Overture 1812 (大編制）
Liszt - La Campenella（鋼琴）
Taeyeon - Let it Snow（流行，Jazz，女聲）
雨宮天 - Defiance (流行，Synthpop，女聲）
Bruno Mars - Finesse (流行，Funk，男聲）
為咗好好試清楚條線，我選擇咗比較中性嘅器材做測試。
DAP：墨菊
IEM: 64Audio U12t（動鐵），Truthear Zero: Red （動圈）
如果做功方面十分滿意，咁係音色方面，依條線會令你更滿足。整體嚟講，依條線並非標奇立異 - 佢帶俾你嘅係，初次聽歌嗰種感動。線材音色中性微暖，硬素質相當唔錯。
低頻：
比例方面，我聽到mid-bass比sub-bass多，意即低音力度比下潛更多。不過，唔好誤會，即使配搭U12t，Zero:Red兩款低頻量不少嘅耳機，Enigma仍然表現出優質嘅下潛。係trap，funk依啲節奏感強烈嘅曲種，拳拳到肉嘅drum machine， 十分過癮。值得一讚嘅係，Enigma低頻控制力十分強。佢既然沒有bloat，亦沒有中低頻bleed，十分乾淨。
中頻：
Enigma嘅中頻，我會形容為「微暖」，不論男聲，女聲都十分適合。中頻少量嘅增益，令歌手同聽者嘅距離感拉近，整體感覺就好似坐係演奏廳第5-6行，距離近卻適合。男聲嚟講，Enigma係U12t下十分準確。一首Bruno Mars嘅<24K Magic>，Bruno Mars興奮嘅唱腔，好似呼叫聽者同佢一齊跳舞。再嚟一首韓國band Jannabi嘅<Summer>，主唱Choi Jung-hoon磁性嘅聲線，娓娓吐出每一詞，每一句。而低音結他受助於mid-bass嘅增益，令decay更逼真，自然。至於女聲，我會形容為甜美。先播放雨宮天嘅<月灯り>。<月灯り>依首歌，屬於雨宮天比較早期嘅歌曲。當時嘅佢，聲線比較清澈，甚至可以話有少許稚氣。配上Zero:Red嘅Enigma不但能夠好好還原依種音色，更仿佛給予雨宮天一種堅定，令雨宮天嘅聲線空靈，卻又堅實。接住，播放Taeyeon嘅<U R>。有聽開Taeyeon嘅朋友都知道，Taeyeon雖然聲底硬朗，技巧卻十分出色，轉音，爆發力都十分強，不論快歌慢歌都可以好好演繹。係Enigma嘅加持下，Taeyeon嘅聲線雖然保持硬郎，卻好似多咗一絲甜意，同Taeyeon嘅聲樂技巧相得益彰，令我不禁讚嘆。再嚟一首蔡琴嘅<渡口>，蔡琴嘅每一字，每一句，係Enigma下娓娓道來。聽者彷如坐係廳堂之中，傾聽蔡琴訴說嘅故事。器樂方面，大部分嘅樂器，尤其偏低音嘅器材（如前文所提及嘅低音結他)都算準確。播放Liszt嘅<Hungarian Rhapsody>，琴鍵清脆而跳脫，迴響嘅decay十分自然。雖然我覺得可以更加通透，不過仍然瑕不掩瑜，十分精彩。
高頻：
「通透」，「自然」。依兩嗰詞語正正代表了Enigma嘅高頻。市面上很多線材以「女毒」，聲音甜美作為賣點。的確，這些線材能好好演繹人聲；卻不能兼顧其他器樂嘅表現，得此失彼。Enigma做到的，係兩者兼顧。適當嘅增益，加上良好嘅延伸，令歌曲十分自然。不論小提琴，笛子，甚至drum set入面嘅hi-hat等，Enigma都展示適當嘅光澤，唔會過分亮麗。就算係現代嘅synthesizer，亦唔會有不理想嘅distortion。嚟一首IZ*ONE嘅<Fiesta>，synth trumpet雖然動感，卻又不刺耳，十分生動。
質素：
對我嚟講，質素可以話係依條線另一個賣點。不論多動鐵抑或動圈耳機，Enigma都可以幫助自己心愛嘅耳機解放潛能。最明顯嘅提升，莫過於聲場同層次。換上Enigma，U12t嘅音場明顯變得更廣，更闊。不同器樂嘅定位亦十分清晰，係普通嘅pop song/Jazz中我可以清楚指出不同樂器嘅方位。播放Tchaikovsky嘅<Serenade for Strings in C major>，我猶如身處一個中型音樂廳之中，聲音從四方八面傳來。誠然，貪心嘅我當然希望音場更大，更闊。不過，以大部分嘅流行曲或小編制嚟講，Enigma所提供嘅已經足夠有餘。除咗聲場同定位之外，Enigma更提升耳機嘅密度同動態。相比動圈耳機，動鐵耳機更有明顯的提升，大大解決好多動鐵耳機生硬嘅問題，令整體聽感更自然。
建議配搭：
總括而言，Enigma係一條中聲微暖，質素優秀嘅耳機線。對我嚟講，Enigma適配度幾高，基本上插咩耳機都唔會有好大相沖。如果你依加正在揾一條耳機線，而又希望線材擁有以下嘅特質，Enigma值得你一試：
- 溫暖又自然嘅聲底
- 輕鬆卻不失密度嘅細節
- 拓闊嘅聲場
然而，如果你追求以下嘅特質，其他線材可能更適合你：
- 人聲靠前
- 十分澎湃嘅高音或低音
對比其他耳機線
Eletech iliad：
聽Enigma嗰刻，腦海中立刻想起iliad，因為印象中兩者都比較溫潤，自然。那麼，事實上兩者真係如似相似嗎？出乎我意料，兩條線聽感明顯不同。雖然兩者都有銀鍍金嗰種柔和嘅美感，不過相較之下iliad明顯比較bright，而Enigma比較暖，也許係因為Enigma嘅mid-bass比較多。配搭U12t，我會話兩者不分彼此，只係適合不同風格嘅歌曲。聽比較現代嘅流派，如jpop，kpop等，我會偏向iliad；至於民謠，小編制等，我會選擇Enigma。配搭方面，我會話iliad比較適合偏暖/偏暗嘅耳機（如Noble Audio Ronin等)，有助加強高頻延伸。而Enigma則適合配搭中性/中性偏bright嘅耳機（如Campfire Audio Solaris Stellar Horizon)，有助給予潤澤度，令聲音更自然。
Eletech Sonnet of Adam：
「大佬，兩條線相差3倍價錢，點比呀？」的確，兩條線價錢相差有點距離，不過聽Enigma嗰時，又令我諗起Sonnet of Adam。整體嚟講，兩條線都希望還原自然嘅音色，只係表現手法不同。Sonnet of Adam人聲比較清澈，器樂比較柔順；Enigma則人聲和器樂都比較柔順。質素方面，話哂旗艦線材，Sonnet of Adam係音場，定位同分析力方面，明顯比Enigma更勝一籌。不過，請記得Enigma並非遠遠不及。係依嗰價位，我覺得佢已經交足功課。配搭方面，我覺得兩條線都係適合配一啲比較中性嘅耳機，純粹係睇聽開嘅音樂種類。聽開hifi女聲嘅燒友，Sonnet of Adam會更適合你；聽開近代歌手嘅燒友，Enigma會更適合你。
Eletech Ode to Laura：
兩條線價錢唔同，聲音更唔同。Ode to Laura嘅聲音分布為倒三角形（即高頻較多，低頻較少），而Enigma嘅聲音分佈為葫蘆型（即低頻和中頻較多，高頻較少）。我覺得Ode to Laura適合一啲高頻能量不多嘅耳機（如Campifre Audio Trifecta等），而Enigma則適合一啲想要更多中低頻嘅耳機（如Final Audio A8000等）。
總結
近十年來，隨身音響市場發展迅速。10年前，一對~$4000嘅耳機已經令人趨之若鶩；十年後嘅今日，一條~$8000嘅器材卻只係「中階」設備。我哋不禁反思，究竟真係科技進步咗，抑或純粹係價錢貴咗呢？我覺得，與其探討一個無答案嘅迷團，不如回歸初心。當初，係咩嘢令你決定購買更好嘅音響器材呢？我講先：我係為咗更好咁欣賞自己鍾意嘅歌曲。我相信，唔少燒友亦有類似嘅原因。既然係咁，何必我哋搞得咁複雜？好聽，咁咪ok！優良的做工，加上穩定的音質，Enigma對我嚟講，唔再係一個謎。相反，佢更似一把鎖匙，帶領燒友打開玩音響設備嘅各種謎團，尋找當初聽歌嘅簡單，悸動。
